英國新手駕駛/考牌10問10答

近排，好似又有新一波移民潮，越來越多人計劃過黎英國。可能因為太多太多唔同嘅資訊，好多問題由月經變日經。小編今次幫大家整理出與駕駛、駕照或保險有關的10個最常問的主題。希望這將有助於大家順利過渡英國生活。

大家揸車之前，特別係換牌既，請睇睇 Highway Code 先，呢度比個路牌速成ＰＤＦ大家

1)我而家係Ｐ牌，可唔可以轉英國牌？
英國冇Ｐ牌既，香港Ｐ牌過到黎同其他牌齡人士一樣可以直接填 DVLA 張 D1 Form 轉英國 Full License，張表可以去 Post Office 免費拎。不過，如果係冇申請定國際牌，租車公司多數都唔會租車比你，冇咁方便。另外，買車前，你冇 UK Full License，甚至你有國際牌都可能唔會比你試車，大家要留意番。

2)我要準備咩文件轉牌？
如果係香港車牌冇換過，你基本上唔洗申請張 TD320，因為你手持嘅車牌已經有你個牌齡。不過，係想嘅都可以申請定先，有備無患。另外,上面都提過，你想租車揸住先的話最好申請埋國際牌，方便好多，因為我自己經驗係佢望一望個牌，影印 Passport 就冇問其他嘢。

3)國際牌會難Ｄ出保險？係唔係換左英國牌先好啲？
買車保方面，佢會因應你持有嘅牌照、牌齡、車款、車價及住址去報價比你，保險就一定出到，只係幾錢咁解。而香港人第一年過到黎，冇 NCB 又唔係咩特別車，全保一般都係£1,500上落，轉到英國牌就平番 £200-300不等。大家可以諗諗係唔係真係好急買車，又或者睇自己預算計劃一下。

4)有朋友黎探我，可唔可以加佢個名落保險做 Named Driver ?
好多公司都唔接受國際車牌人士做 Named Driver，就算搵 Temp Insruance公司，個價錢分分鐘仲貴過租車，除非佢會黎好長時間（兩星期以上），如果唔係，小編建議租車會方便啲，萬一出咩意外，唔洗煩報唔報保險又少啲拗撬。比少少錢，唔會冇左個朋友。

5）我香港牌齡滿３年，可唔可以幫家人朋友練車？
英國好得意，為咗你考完個牌真係可以上路，佢容許一個持有正式駕駛執照滿３年既人去帶住一個學牌去練車。當然你雙方都有一定規則要遵守。不過，呢一點唔同人都問過 DVSA/DVLA，有人話得有人話唔得。而小編會話比你聽你得嘅。有興趣知點解，可以去另一篇文章睇我同 DVLA/DVSA 嘅詳細對話，小編唔似其他人咁 Post 啲唔 Post 啲出黎。

>> 香港轉UK Full License 可唔可以傍住L牌之迷思 <<

6)係唔係要住滿185日先可以申請學牌同考試?
申請學牌同考筆試都係唔洗嘅，只要你個VISA容許你逗留多過185日就可以申請過考，路試你都可以約埋先，不過考試當天或之前係要住滿185日。由於近期不論考試期同師傅期都好爆。如果係有計劃喺呢邊學車，建議你安排好時間申請左先。一來呢邊車牌張卡可以當身分証用，學牌都可以。

7）Breakdown Recovery 有冇用？買唔買好？
英國地大物博，出個城都最少廿幾英里，有時架車打左柴你又唔識搞，Breakdown Recovery 就好幫得手。不過，唔好用香港個標準隨傳隨到，有人試過 Call 完都要等幾個鐘先出現。同埋，有好多唔係同級數既 Cover，有啲你架車唔揸得住仲有得借車。當然大家可以因應自己嘅需要選擇。

不過，有冇買 Recovery 都有，有啲架生都應該買黎放喺車備用，大家可以參考小編之前既另一文章：

>> 車尾箱必備急救物品 – 保命採購清單！ <<

8)係唔係柴油車就要俾入城費?
唔係，只要你架車係歐盟6期 Euro 6，合符廢氣排放標準就唔需要俾 Clear Air Zone Fee。而 London 個 Congestion Fee 就係車都要比咖喇。另外，小編有個入油秘技：

>> 最平入油絕技？仲平過去 Costco？ <<

9)除左香港考嘅車牌仲有咩地方可以換 UK License?
仲有好多咖，詳細如下：安道爾、澳洲、巴巴多斯、英屬處女島、加拿大、開曼群島、福克蘭群島、法羅群島、直布羅陀、香港、日本、摩納哥、紐西蘭、韓國、北馬其頓共和國、新加坡、南非、瑞士、台灣、烏克蘭、阿拉伯聯合酋長國同津巴布韋。

10)新手買車買咩好?
好難一概而論，因為有人預算唔多，買架平嘅揸到就算。亦有人有預算又覺得唔識車唔想煩去買新車或者 Approved Used Car。而係唔係有神車唔會壞呢個傳說就見人見志喇。大家可以留意下街上面有咩車個車牌係零幾年仲行緊嘅就知咩車都有。大家睇餸食飯咪得囉。

以上只係小編嘅經驗或者資料所得，有可能各大機構已經改左政策又或者資訊過時。歡迎大家喺下面留言指正或發問。多謝大家。

另另外，歡迎加入我地嘅 Whatsapp 推送群組及其他分區群組以獲得最新資訊！