最近天氣轉涼，好多朋友都話每日朝早起身，窗邊都係滿晒水珠，成個玻璃好似落完雨咁。唔少人以為係正常現象，但其實「水氣凝結」（condensation）如果長期出現，唔單止影響視線，更可能造成牆身發霉、空氣濕度過高，甚至引致氣喘、濕疹、支氣管炎等健康問題。
為何窗會有水氣？
所謂水氣，其實係室內暖空氣遇上冷玻璃表面時產生。當你喺屋企煮飯、沖涼、甚至瞓覺呼吸，都會製造濕氣，而當啲濕氣接觸到冷空氣，就會變成水珠黏喺玻璃上。
喺英國特別容易發生，因為秋冬季日夜溫差大，屋內暖氣同窗外低溫嘅對比更明顯。如果屋企空氣唔流通，或者長期潮濕，就更容易積聚水氣。
點樣防止窗邊「落雨」？
要處理問題，最根本就係改善通風、保溫、同濕度。以下幾個方法簡單又實用：
開窗通風（最直接）
每日早晚開窗幾分鐘，尤其係沖涼同煮飯之後，能夠即時將濕氣排出。不過冬天太凍時可以選擇短時間快速開窗換氣。
用醋水清潔玻璃
英國專家建議，用「一半白醋 + 一半清水」混合，用布抹喺玻璃或鏡面上，再抹乾淨。醋可以暫時防止起霧，大約可維持一星期。若嫌味道太強，可加少少檸檬汁改善氣味。
洗潔精防霧法
用微量洗潔精抹勻窗面同窗框，會形成一層「防水氣保護膜」，有效阻止水珠重新出現。
烹飪及洗澡習慣要改
煮嘢食時記得蓋上鍋蓋；沖涼要開抽氣扇；盡量縮短沖涼時間；晾衫唔好掛喺暖爐附近或屋內（尤其冬天），會令濕氣更重。
製造空氣流通
如果你屋有對窗，可以同時打開兩邊幾分鐘，令空氣穿流，效果比單開一邊更好。
長期忽視水氣問題，容易令黑霉（black mould）出現，一旦發霉就難清理，對呼吸系統同皮膚都唔好。所以，每日處理、保持乾爽，係最實際嘅防霉方法。
消息來源： The Mirror
▶️又可以入黎唔同嘅分區群組，一齊熱情討論🔥
🔗https://hongkongin.uk/uk-hkers-groups
▶️英國精明鴨為你每日帶來唔同嘅情報，唔好錯過！🎯
🔗https://hongkongin.uk/go/uk-bargain-duck
▶️又可以加入打工仔乜都得聊天室交流群組💪
🔗https://hongkongin.uk/jobinuk
