呢個問題，喺唔同嘅大大小小群組入邊，都係經常討論嘅一個話題。有人話五年內唔可以超過450日，又有人話一年唔可以超過90日。咁究竟邊一個日子先係真嘅呢？今次就幫大家了解一下。
BNO Visa 離境日期條件
首先，大家要知道每一個簽證都會有佢嘅條件，包括係入境嘅條件同埋離境嘅條件。咁BNO Visa嘅入境條件好簡單，大家申請嘅時候已經知道㗎啦，就係有批出嘅嗰一日開始，五年內都可以留係英國境內。咁離境條件又係乜呢？根據英國Home Office嘅網站，內容如下：
就係任何過去12個月內，你唔可以有超過180日離開英國境內（大約係一年有六個月），只要你符合呢一個要求，你個BNO Visa就係生效嘅。
咁究竟一年級90日又去邊度走出嚟嘅呢？答案就係BNO Visa 5+1 ，最尾嗰一年啦。當你符合左以上條件，有連續居住咗喺英國境內滿五年，你就可以申請一個叫做 Indefinite leave to remain （ILR 又名永久居留權），而申請呢一個 ILR 嘅離境要求條件係更加之嚴格嘅，英國政府嘅網站係咁樣講：
總括來講有兩點，第一點係喺過去嘅五年內你唔可以離境超過450日（平均每年90日）。第二點係喺過去嘅12個月內，你唔可以離境超過90日。
所以答案係：打和啦Super ！
總結：
1） BNO Visa嘅離境條件係每年最多180日
2）ILR 永久居留權嘅離境條件係每年最多90日
免責聲明：本網站只作資料蒐集及整理如有任何更改，請以英國政府網站資料為準，本網站並不承擔任何責任。
